តើអ្នកធ្លាប់ឆ្ងល់ទេថា ហេតុអ្វីបានជាមនុស្សមួយចំនួនហាក់ដូចជាគេងលក់ស្រួលរាល់យប់ ខណៈពេលដែលអ្នកខ្លះមានប្រែខ្លួនចុះឡើងៗរាប់ម៉ោង ឬភ្ញាក់ម្ដងហើយម្ដងទៀតទម្រាំនឹងអាចគេងលក់? បញ្ហាទាំងនេះអាចមកពី ទម្លាប់នៃការគេងរបស់អ្នក។ ទម្លាប់ល្អនៃការគេង គឺជាការរួមបញ្ចូលគ្នារវាងលក្ខខណ្ឌនៃការគេង និងទម្លាប់រស់នៅ ដែលជួយឱ្យអ្នកគេងលក់បានស្កប់ស្កល់ និងគេងលក់បានយូរដោយគ្មានការរំខាន។

អត្ថប្រយោជន៍នៃទម្លាប់ល្អនៃការគេង

ទម្លាប់ល្អនៃការគេងអាចជួយអ្នកបានយ៉ាងច្រើន។ នៅពេលអ្នកគេងបានគ្រប់គ្រាន់ (ចន្លោះពី ៧ ទៅ៨ ម៉ោងក្នុងមួយយប់) អ្នកអាចនឹង៖

• កាត់បន្ថយការឈឺថ្កាត់ផ្សេងៗ

• រក្សាទម្ងន់ឱ្យមានសុខភាពល្អ

• បង្ការបញ្ហាសុខភាពនានាដូចជា ជំងឺទឹកនោមផ្អែម និងជំងឺបេះដូង

• មានអារម្មណ៍រីករាយជាងមុន និងកាត់បន្ថយភាពតានតឹង

• អាចគិតអ្វីៗបានច្បាស់លាស់ក្នុងអំឡុងពេលថ្ងៃ

ចូរគិតគូរពីការផ្លាស់ប្តូរទម្លាប់នៃការគេងរបស់អ្នក ប្រសិនបើអ្នកមានបញ្ហាពិបាកគេងលក់ គេងមិនលក់ពេញមួយយប់ ឬមានអារម្មណ៍ងងុយគេងខ្លាំងនៅពេលថ្ងៃ ដែលទាំងនេះអាចជាសញ្ញានៃទម្លាប់មិនល្អនៃការគេង។

របៀបអនុវត្តទម្លាប់ល្អនៃការគេង

អ្នកអាចអនុវត្តតាមជំហានសាមញ្ញៗខាងក្រោមដើម្បីបោះបង់ទម្លាប់អាក្រក់ និងទទួលបានការគេងដែលមានគុណភាពល្អ៖

• ធ្វើឱ្យមានភាពទៀងទាត់៖ សូមចូលគេង និងក្រោកពីគេងនៅម៉ោងដដែលជារៀងរាល់ថ្ងៃ (រួមទាំងថ្ងៃចុងសប្តាហ៍ផងដែរ)។ ការធ្វើបែបនេះនឹងបង្វឹកឱ្យរាងកាយរបស់អ្នកស៊ាំទៅនឹងទម្លាប់ ដែលជួយឱ្យអ្នកងងុយគេងតាមម៉ោងកំណត់ និងភ្ញាក់មកវិញដោយភាពស្រស់ស្រាយ។

• រៀបចំបន្ទប់គេង៖ រក្សាបន្ទប់គេងឱ្យស្ងាត់ ងងឹត និងមានសីតុណ្ហភាពសមរម្យ (គ្រូពេទ្យភាគច្រើនណែនាំចន្លោះពី ១៥°C ទៅ ១៩°C)។

• បង្កើតបរិយាកាសសម្រាក៖ រក្សាបន្ទប់គេងឱ្យស្អាត និងមានរបៀបរៀបរយ។

• បង្កើតទម្លាប់មុនពេលចូលគេង៖ សាកល្បងធ្វើសមាធិ ធ្វើយូហ្គា ឬហាត់ពត់ខ្លួនតិចៗមុនពេលចូលគេង។

• កម្រិតការគេងថ្ងៃ៖ កុំគេងថ្ងៃយូរពេក។

• គ្រែសម្រាប់តែគេងប៉ុណ្ណោះ៖ កុំអានសៀវភៅ ឬមើលទូរទស្សន៍នៅលើគ្រែ។

• កុំយកឧបករណ៍អេឡិចត្រូនិកចូលបន្ទប់គេង៖ ទូរស័ព្ទ ឬកុំព្យូទ័រ ដែលអាចបញ្ចេញពន្លឺពណ៌ខៀវ (Blue light) ដែលប៉ះពាល់ដល់ការផលិតជាតិមេឡាតូនីន (Melatonin) ក្នុងរាងកាយ។

• កុំបរិភោគអាហារច្រើនជ្រុលមុនគេង កាត់បន្ថយជាតិកាហ្វេអ៊ីន និងគ្រឿងស្រវឹង។

• ហាត់ប្រាណនៅពេលថ្ងៃ៖ ការធ្វើចលនារាងកាយនៅពេលថ្ងៃ ជួយឱ្យអ្នកគេងលក់កាន់តែងាយស្រួល។

តើពេលណាដែលត្រូវទៅជួបគ្រូពេទ្យ?

ប្រសិនបើអ្នកបានសាកល្បងផ្លាស់ប្តូរទម្លាប់ហើយ ប៉ុន្តែនៅតែមិនមានប្រសិទ្ធភាព ចូរពិគ្រោះជាមួយគ្រូពេទ្យ។ អ្នកអាចនឹងមានបញ្ហានៃការគេង ដូចជាវិបត្តិដំណេក ដែលត្រូវការ ប្រឹក្សា និងព្យាបាលជាមួយអ្នកជំនាញ។​

អ្នកជំនាញអាចនឹងណែនាំនូវវិធីមួយចំនួនដូចជា៖

• ការប្រើប្រាស់ថ្នាំ៖ ដូចជាជាតិមេឡាតូនីន (ដែលរាងកាយផលិតឡើងដើម្បីជួយដល់ការគេង)។

• ការព្យាបាលដោយពន្លឺ (Light therapy)។

• ការព្យាបាលតាមរយៈការកែប្រែការយល់ដឹង និងឥរិយាបថ ដែលគ្រូពេទ្យនឹងជួយអ្នកឱ្យផ្លាស់ប្តូរ គំនិត និងឥរិយាបថអវិជ្ជមានជុំវិញការគេង។

 ប្រភពអត្ថបទ៖ WebMD