ជំងឺសិរមាន់លើប្រដាប់ភេទ
អ្វីទៅជាជំងឺសិរមាន់?
សិរមាន់ជា ជំងឺឆ្លងតាមការរួមភេទ ដែលបង្កឡើងដោយ វីរុស Human Papilloma Virus ហៅកាត់ថា អេច ភី វី (HPV) ប្រភេទទី៦ និង១១។
តើជំងឺសិមាន់មានរោគសញ្ញាដូចម្ដេច?
រោគសញ្ញាដំបូងនៃជំងឺសិរមាន់ ផ្តើមដោយកំពកសាច់តូច មួយឬច្រើន នៅទ្វារមាស ឬលិង្គ ឬតំបន់ជិតៗទ្វារមាស ឬរន្ធគូទ មានការរមាស់និងអាចមានធ្លាក់ស។ ការដុះកំពកៗដោយសារកើតជំងឺសិរមាន់គឺសំដៅទៅលើការដុះសាច់ដូចជាសិរមាន់ដែលអាចឡើងខ្ពស់ ឬសំប៉ែត មួយ ឬច្រើន តូច ឬធំ។ ខ្លះប្រមូលផ្តុំគ្នាបង្កើតបានជារាងដូចផ្កាខាត់ណា។
ការធ្វើរោគវិនិច្ឆ័យដោយគ្រូពេទ្យ
គ្រូពេទ្យនឹងសុំការអនុញ្ញាតពីអ្នកដើម្បីពិនិត្យមើលប្រដាប់ភេទ។ ដោយឲ្យអ្នកគេងលើគ្រែពិនិត្យជំងឺ។
គ្រូពេទ្យធ្វើការពិនិត្យដោយភ្នែកទទេទៅលើដុំសាច់ដែលដុះ និងធ្វើការវែកញែកអំពីប្រភេទដុះពកៗដទៃទៀតដែលមិនមែនជាជំងឺសិរមាន់។
ជួនកាលសាច់ដុះខ្លះមិនមែនជាជំងឺសិរមាន់ទេ ដូចជាពេលខ្លះមានពងសៗ ដូចគុជនៅលើចុងលិង្គរបស់បុរស។ ជួនកាលមានចំណុចពកៗនៅលើប្រដាប់ភេទស្ត្រី។
គ្រូពេទ្យអាចស្នើសុំបូមឈាម ឬធ្វើតេស្តរកមើលជំងឺឆ្លងដទៃទៀតតាមផ្លូវបន្តពូជ។
សូមមកជួបគ្រូពេទ្យជាមុនសិន មុននឹងសិន្និដ្ឋានថាដុំពកតូចៗនោះជាជំងឺសិរមាន់។
តើជំងឺសិមាន់អាចព្យាបាលតាមវិធីណាខ្លះ?
ការរព្យាបាល ធ្វើទៅតាមទីតាំងសាច់ដែលដុះ ដូចជា សាច់ជាជំងឺសិរមាន់ ដែលដុះនៅផ្នែកខាងក្រៅប្រដាប់បន្តពូជ សិរមាន់ដែលដុះនៅក្នុងរន្ធនោម សិរមាន់ដែលដុះក្នុងទ្វារមាស ឬមាត់ស្បូន ឬរន្ធគូទ។ ជាទូទៅវិធីព្យាបាលមានដូចខាងក្រោម៖
គ្រូពេទ្យអាចឲ្យទឹកថ្នាំ Podophyllin 0.5% លាបលើសាច់ដុះ ២ ដងក្នុង១ថ្ងៃ រយៈពេល ៣ ថ្ងៃរួចឈប់ ៤ ថ្ងៃ។ អាចរំលឹកឡើងវិញរហូតដល់ ៤ សប្តាហ៍ ឬ
Trichloroacetic acid 80-90% (TCA) លាបម្តងក្នុងមួយសប្តាហ៍រយៈពេលច្រើនសប្តាហ៍ប្រសិនបើចាំបាច់
គ្រូពេទ្យអាចប្រើឧបករណ៍ដុតយកសាច់ដែលដុះពកៗទាំងនោះចេញ។
ការប្រឹក្សា និងតាមដាន
អ្នកត្រូវតមរួមភេទ ឬប្រើស្រោមអនាម័យក្នុងអំឡុងពេលព្យាបាល។
ប្រាប់ និងណែនាំដៃគូឲ្យមកពិនិត្យទោះគ្មានរោគសញ្ញាក៏ដោយ។
សិរមាន់អាចបាត់ទៅវិញ ឬនៅដដែល ឬដុះច្រើនទៅៗ និងធំទៅៗ។ ការព្យាបាលគឺគ្រាន់តែយកសាច់ដុះចេញប៉ុណ្ណោះ មិនមានថ្នាំអាចសម្លាប់មេរោគឲ្យជាសះស្បើយបានទេ ។ ការដុះឡើងវិញ អាចកើតមានជាពិសេសក្នុងអំឡុង ៣ខែបន្ទាប់ពីព្យាបាល។
មេរោគ អេច ភី វី អាចចម្លងទៅអ្នកដទៃទោះបីជាគ្មានរោគសញ្ញាក៏ដោយ។
គ្រូពេទ្យអាចឲ្យអ្នកចាក់វ៉ាក់សាំង អេច ភី វី បើអ្នកមិនទាន់ឆ្លងវីរុស HPV ដែលបង្កជំងឺសិរមាន់។
អត្ថបទពាក់ព័ន្ធផ្សេងៗទៀត
ការយល់ដឹងពីជំងឺមហារីកមាត់ស្បូន និងការបង្ការ
https://tinyurl.com/kfyb4ydn
សំណួរ-ចម្លើយស្ដីពីជំងឺសិរមាន់
https://tinyurl.com/2jzzcjup
មតិយោបល់