ស្វែងយល់ពីបញ្ហាផ្សិតទ្វារមាស
ការបង្ករោគដោយផ្សិតនៅតំបន់ទ្វារមាស កើតឡើងនៅលើស្ត្រីជាញឹកញាប់ ព្រោះធម្មតាទ្វារមាស មានផ្ទុកបាក់តេរី និងកោសិកាផ្សិតមួយចំនួន ប៉ុន្តែនឹងធ្វើឲ្យមានបញ្ហានៅពេលតុល្យភាពកោសិកាទាំងនោះមានការប្រែប្រួល ដែលអាចបង្កឱ្យមាន រមាស់ខ្លាំង ហើម ក្រហាយទ្វារមាស និងបរិវេណយោនី ជាដើម។
ផ្សិតក្នុងទ្វារមាស មិនត្រូវចាត់ទុកជាក្រុមជំងឺឆ្លងតាមការរួមភេទនោះទេ បើទោះជាអាចឆ្លងតាមរួមភេទក៏ដោយ ប៉ុន្តែក៏អាចកើតលើស្រ្តីដែលមិនធ្លាប់មានការរួមភេទដែរ។
នៅពេលអ្នកចាប់ផ្តើមមានសកម្មភាពផ្លូវភេទ អ្នកប្រឈមហានិភ័យនៃការឆ្លងមេរោគផ្សិតក្នុងទ្វារមាស។ ហើយការឆ្លងមេរោគផ្សិតនេះ មិនមែនតែនៅលើប្រដាប់ភេទ ប៉ុណ្ណោះទេ វាក៏អាចឆ្លងនៅពេលដែលអ្នកមានទំនាក់ទំនងផ្លូវភេទរវាងមាត់ និងតំបន់ប្រដាប់បន្តពូជ បានផងដែរ។
បើអ្នកធ្លាប់មានការបង្ករោគដោយមេរោគផ្សិតម្តងរួច អ្នកនឹងប្រឈមការបង្ករោគជាច្រើនផ្សេងទៀត។
ទោះជាយ៉ាងណាវាមិនមែនជារឿងដែលគួរឱ្យបារម្ភខ្លាំងនោះទេ។ ជំងឺផ្សិតក្នុងទ្វារមាសអាចព្យាបាលបានដោយឱសថ។ ប៉ុន្តែការឆ្លងមេរោគផ្សិតដែលកើតឡើង បួនដង ឬច្រើនជាងនេះក្នុងមួយឆ្នាំ អាចត្រូវការ ការព្យាបាលរយៈពេលយូរ និងត្រូវមានវិធានការបង្ការ។
អ្នកអាចកត់សម្គាល់ថាអ្នកមានជំងឺផ្សិតក្នុងទ្វារមាសបាន ដោយត្រូវចាប់អារម្មណ៍នូវរោគសញ្ញាមួយចំនួន។
រោគសញ្ញានៃការឆ្លងមេរោគផ្សិតអាចមានចាប់ពីកម្រិតស្រាលទៅមធ្យម។ រោគសញ្ញាទាំងនោះរួមមាន៖
• រមាស់ និងរលាកក្នុងទ្វារមាស និងជាលិកានៅទ្វារមាស ហៅថា យោនី។
• មានអារម្មណ៍ក្ដៅ ឬក្រហាយ ក្នុងអំឡុងពេលរួមភេទ ឬពេលបត់ជើងតូច។
• ក្រហម និងហើមទ្វារមាស។ អ្នកអាចអង្កេតយ៉ាងហ្មត់ចត់ប្រសិនបើអ្នកមានស្បែកខ្មៅ ឬត្នោត ព្រោះអាចពិបាកមើលជាងស្បែកស។
• ឈឺនៅបរិវេណទ្វារមាស។
• មានធ្លាក់ស សភាព កកៗ ដែលមានក្លិនតិចតួច ឬគ្មានក្លិន។
ការឆ្លងមេរោគផ្សិតស្មុគស្មាញ
អ្នកអាចមានការឆ្លងមេរោគផ្សិតដ៏ស្មុគស្មាញ ប្រសិនបើ អ្នកមានរោគសញ្ញាដូចខាងក្រោម៖
• ឡើងក្រហមច្រើន ហើម និងរមាស់ ធ្លាក់ស ប្រេះ ឬដំបៅក្នុងទ្វារមាស
• អ្នកមានការឆ្លងមេរោគផ្សិតលើសពី៤ដងក្នុងមួយឆ្នាំ។
• ជាប្រភេទផ្សិតដែលមិនសូវកើតមានទូទៅ។
• ស្ត្រីមានផ្ទៃពោះ។
• អ្នកមានជំងឺទឹកនោមផ្អែមដែលគ្រប់គ្រងមិនបានល្អ។
• ប្រព័ន្ធភាពស៊ាំរបស់អ្នកចុះខ្សោយដោយសារតែថ្នាំ ឬលក្ខខណ្ឌមួយចំនួនដូចជាការឆ្លងមេរោគអេដស៍។
ពេលណាត្រូវទៅជួបពិគ្រោះជាមួយគ្រូពេទ្យ
ធ្វើការណាត់ជួបជាមួយអ្នកជំនាញថែទាំសុខភាពរបស់អ្នក ប្រសិនបើ៖
• នេះជាលើកទីមួយហើយដែលអ្នកមានរោគសញ្ញានៃការឆ្លងមេរោគផ្សិត។
• អ្នកមិនប្រាកដថា តើអ្នកមានការឆ្លងមេរោគផ្សិតឬអត់?
• រោគសញ្ញារបស់អ្នកមិនបាត់ទៅវិញទេ បន្ទាប់ពីអ្នកព្យាបាលវាដោយប្រើថ្នាំលាបទ្វារមាស ឬថ្នាំគ្រាប់ដែលអ្នកបានទទួលដោយគ្មានវេជ្ជបញ្ជា។
• អ្នកមានរោគសញ្ញាផ្សេងទៀតដែលគួរឱ្យបារម្ភ ឬអ្នកមិនមានភាពស្រណុក និងរំខានក្នុងការធ្វើសកម្មភាពប្រចាំថ្ងៃ។
អ្នកអាចស្វែងរកការពិគ្រោះ និងសេវាព្យាបាលតាមរយៈលេខទំនាក់ទំនងខាងក្រោម៖
010 812 812 /089 333 990 /088 7107 107។
ប្រភពអត្តបទ៖ MAYO CLINIC
មតិយោបល់