លំហាត់ប្រាណសម្រាប់ស្ត្រីពេលមានផ្ទៃពោះ
ភាគច្រើននៃស្ត្រីតែងគិតថា ពេលពពោះមិនគួរហាត់ប្រាណ លើកដៃលើកជើង ព្រោះខ្លាចប៉ះពាល់កូនក្នុងផ្ទៃ។ តែតាមការណែនាំពីអ្នកជំនាញ ស្ត្រីមានផ្ទៃពោះ គួរចាប់ផ្តើមហាត់ប្រាណពីត្រីមាសដំបូង ដល់ត្រីមាសទី៣ ហើយការហាត់ប្រាណនេះមិនតម្រូវឱ្យធ្វើសកម្មភាព ឬប្រើកម្លាំងខ្លាំងៗនោះទេ គឺធ្វើទៅតាមកម្លាំងស្រាលៗ ហើយធ្វើសកម្មភាពណាដែលមានសុត្ថិភាពសម្រាប់ខ្លួន។ ការធ្វើលំហាត់ប្រាណនេះ មានប្រយោជន៍ច្រើនណាស់ ទាំងសុខភាពម្តាយ និងគភ៌ក្នុងផ្ទៃ ដូចជា៖
កាត់បន្ថយការឈឺចាប់ខ្នង
សម្រួលដល់ការទល់លាមក
អាចបន្ថយហានិភ័យនៃ ជំងឺទឹកនោមផ្អែម បម្រុងក្រឡាភ្លើង និង ការសម្រាលកូនដោយវះកាត់
លើកកម្ពស់ការឡើងទម្ងន់ប្រកបដោយសុខភាពក្នុងពេលមានផ្ទៃពោះ
ធ្វើឱ្យប្រសើរឡើងនូវសមត្ថភាពទូទៅរបស់អ្នក និងពង្រឹងបេះដូង និងសរសៃឈាមរបស់អ្នក
ជួយឲ្យអ្នកស្រកទម្ងន់ក្រោយពេលសម្រាល
អ្នកជំនាញយល់ស្របថាលំហាត់ទាំងនេះមានសុវត្ថិភាពបំផុតសម្រាប់ស្ត្រីមានផ្ទៃពោះ៖
• ការដើរ៖ ជាលំហាត់ប្រាណងាយៗ មិនចំណាយថវិកា ដែលធ្វើឱ្យរាងកាយមានចលនា ជួយសម្រួលដល់សន្លាក់ សាច់ដុំ និងមិនចាំបាច់ហាត់នៅទីណាឆ្ងាយទេ ត្រឹមដើរជុំវិញ ឬក្នុងផ្ទះក៏បាន។ ស្ត្រីអាចអនុវត្តត្រឹមតែ ១០នាទីក្នុងមួយថ្ងៃ និង៣ ទៅ៥ដង ក្នុងមួយសប្ដាហ៍។
• ការហែលទឹក៖ ការហែល ឬដើរក្នុងទឹក អនុញ្ញាតឱ្យរាងកាយមានចលនាដោយមិនដាក់សម្ពាធលើសន្លាក់។ ទឹកអាចទ្រ ទម្ងន់របស់អ្នក ដូច្នេះអាចចៀសផុតពីការរងរបួស និងភាពតឹងនៃសាច់ដុំ។ពេលហែលទឺកត្រូវធ្វើចលនាស្រាលៗ ចៀសវាងការប្រឹងក្បាលពោះខ្លាំង បើហត់ត្រូវឈប់សម្រាក មិនត្រូវបង្ខំទេ។ ស្ត្រីអាចហាត់ពី ៣ ទៅ៥ដងក្នុងមួយសប្ដាហ៍ ដែលម្ដងៗមានរយៈពេល៣០នាទី។
• ការធាក់កង់មួយកន្លែង៖ សកម្មភាពនេះមិនតម្រូវឱ្យជិះកង់នៅខាងក្រៅ ដែលអាចប្រឈមលើផ្លូវរលាក់ និងគ្រោះថ្នាក់ផ្សេងៗនោះទេ។ ស្ត្រីអាចហាត់រយៈពេល៣០នាទី ក្នុងមួយថ្ងៃ និងពី ២ទៅ៣ ដងក្នុងមួយសប្ដាហ៍។
យូហ្គា៖ ជួយកាត់បន្ថយស្ត្រេស បង្កើនភាពបត់បែន ជំរុញការដកដង្ហើមបានវែង និងអាចឱ្យស្ត្រីចេះពីរបៀបប្រឹង ដែលមានប្រយោជន៍នៅពេលសម្រាលកូន ដូចជាការអង្គុយសមាធិដែរ តែក្រោយមក គេបញ្ចូលការពត់ពែនខ្លួនបែបស្រាលៗ ហើយត្រូវគេអះអាងថា មិនមានអ្វីប៉ះពាល់ដល់គភ៌ក្នុងផ្ទៃឡើយ។ ស្ត្រីអាចធ្វើលំហាត់ប្រាណនេះបែបស្រាលៗ ត្រឹម៣០នាទីក្នុងមួយថ្ងៃ និងម្ដងក្នុងមួយសប្ដាហ៍។
ហាត់ប្រាណពង្រឹងសាច់ដុំត្រគាក៖ ជាវិធីហាត់ប្រាណមួយប្រភេទ ជួយពង្រឹងសាច់ដុំអាងត្រគាក ជាកន្លែងទ្រទ្រង់ស្បូន ប្លោកនោម និងពោះវៀន។ មានផ្ទៃពោះ សម្រាលកូន វ័យចាស់ជរា និងលើសទម្ងន់ សុទ្ធតែអាចធ្វើឲ្យសាច់ដុំអាងត្រគាកស្ត្រីចុះខ្សោយ ហើយសំខាន់នៅពេលវាចុះខ្សោយ យើងអាចប្រឈមបញ្ហាធ្លាក់ត្រគាក ទ្វារមាសឡើងប៉ោង ឬស្រុតស្បូនជាដើម។ លំហាត់ប្រាណអាងត្រគាគ មិនពិបាកទេ ស្រដៀងទៅនឹងការប្រឹងទប់នោម យើងគ្រាន់តែប្រឹងខ្ជឹបសាច់ដុំអាងត្រគាកយើង ហើយទប់វាប្រមាណ ២-៣ វិនាទី ទើបប្រលែងវិញ ធ្វើបែបនេះឲ្យបាន ៥០ដង រៀងរាល់ថ្ងៃ។
មតិយោបល់