ប្រធានបទ៖ ការចេញទឹកកាម
ទឹកកាមគឺជាសារធាតុរាវដែលចេញពីលិង្គនៅពេលអ្នកបញ្ចេញទឹកកាម។ ការបញ្ចេញទឹកកាមមានប្រហែលបីទៅប្រាំមីលីលីត្រនៃសារធាតុរាវ ប្រហែលមួយស្លាបព្រាកាហ្វេ។ ជារឿយៗរាងកាយចាប់ផ្តើមផលិតមេជីវិតឈ្មោលនៅពេលអ្នកមានអាយុចន្លោះពី ១៣ ទៅ ១៥ឆ្នាំ ប៉ុន្តែវាអាចមានការផលិតមុន និងក្រោយអាយុនេះផងដែរ។
ទឹកកាម គឺជាល្បាយនៃសារធាតុរាវផ្សេងៗគ្នា។ សារធាតុរាវទាំងនេះចេញមកពីថង់ទឹកកាម និងក្រពេញប្រូស្តាត។ មេជីវិតឈ្មោលអាចមានជីវិតបាននៅក្នុងទឹកកាមប៉ុណ្ណោះ។ មានមេជីវិតឈ្មោលរាប់លានចេញមកនៅក្នុងពេលបញ្ចេញទឹកកាម។ ការបញ្ចេញទឹកកាមអាចហូរ ឬបាញ់ចេញ។
តើមេជីវិតឈ្មោលត្រូវបានបង្កើតឡើងយ៉ាងដូចម្តេច?
មេជីវិតឈ្មោលត្រូវបានបង្កើតឡើងនៅក្នុងពងស្វាស ហើយបន្ទាប់មកធ្វើដំណើរទៅកាន់ អេពីឌីឌីម ជាកន្លែងដែលពួកវាពេញវ័យ និងក្លាយជាមេជីវិតឈ្មោលពេញលេញ។ ដំណើរការនេះចំណាយពេលប្រហែលប្រាំមួយសប្តាហ៍។ ដោយសារតែមេជីវិតឈ្មោលថ្មីត្រូវបានបង្កើតឡើងគ្រប់ពេល ពួកវាមិនដែលអស់ឡើយ មិនថាអ្នកបញ្ចេញទឹកកាមញឹកញាប់ប៉ុណ្ណានោះទេ។
តើមេជីវិតឈ្មោលរស់នៅបានរយៈពេលប៉ុន្មាន?
មេជីវិតឈ្មោលអាចរស់បានរយៈពេលខ្លីណាស់នៅខាងក្រៅរាងកាយ ពួកវាស្លាប់នៅពេលដែលទឹកកាមស្ងួត។ រយៈពេលដែលវាត្រូវការអាស្រ័យលើសីតណ្ហភាព និងបរិមាណទឹកកាម។ រយៈពេលដែលរស់យូរគឺអាស្រ័យលើបរិមាណនៃទឹកកាមច្រើន។ ទោះយ៉ាងណា នៅក្នុងតួស្បូន ឬស្បូន មេជីវិតឈ្មោលអាចរស់នៅបានរហូតដល់មួយសប្តាហ៍។
មេជីវិតឈ្មោលដែលពេញវ័យនៅក្នុងអេពីឌីឌីមត្រូវបានជំនួស ដោយមេជីវិតឈ្មោលថ្មីបន្ទាប់ពីមួយរយៈ។ មេជីវិតឈ្មោលចាស់នឹងចេញពីរាងកាយរបស់អ្នកនៅពេលអ្នកបញ្ចេញទឹកកាម និងនៅពេលអ្នកបត់ជើងតូច។
តើខ្ញុំមានទឹកកាមនៅពេលណា?
ជាទូទៅ រាងកាយមនុស្សច្រើនតែចាប់ផ្តើមផលិតមេជីវិតឈ្មោល នៅចន្លោះអាយុ ១៣ ទៅ ១៥ឆ្នាំ ប៉ុន្តែវាក៏អាចចាប់
ផ្តើមទាំងមុន និងក្រោយអាយុជាមធ្យមនេះផងដែរ។ អ្នកអាចឈានដល់ចំណុចកំពូល នៅពេលសម្រេចកាមដោយខ្លួនឯង ឬរួមភេទជាមួយនរណាម្នាក់ សូម្បីតែមុនពេលអ្នកចាប់ផ្តើមបង្កើតទឹកកាមក៏ដោយ។
ប្រសិនបើមានទឹកកាមនៅពេលអ្នកសម្រេចកាមដោយខ្លួនឯង ឬរួមភេទជាមួយនរណាម្នាក់ នោះមានន័យថា អ្នកមានភាពចាស់ទុំខាងផ្លូវភេទហើយ។ នេះក៏មានន័យថាអ្នកអាចធ្វើឱ្យនរណាម្នាក់មានផ្ទៃពោះបាន ប្រសិនបើអ្នករួមភេទតាមទ្វារមាស និងមិនប្រើប្រាស់ស្រោមអនាម័យ។ ដូច្នេះ ការប្រើប្រាស់ស្រោមអនាម័យគឺជាជម្រើសល្អបំផុត ប្រសិនបើអ្នករួមភេទតាមទ្វារមាស ហើយមិនចង់មានកូន ឬមានកង្វល់អំពីការឆ្លងជំងឺកាមរោគ រួមទាំងជំងឺអេដស៍។
តើការចេញទឹកកាមម្តងៗមានចំណុះប៉ុន្មាន?
ការបញ្ចេញទឹកកាមមានប្រហែលបីទៅប្រាំមីលីលីត្រនៃសារធាតុរាវ ប្រហែលមួយស្លាបព្រាកាហ្វេ។ បរិមាណទឹកកាមអាចខុសៗគ្នាអាស្រ័យលើពេលដែលអ្នកបញ្ចេញទឹកកាមចុងក្រោយ កម្រិតនៃការស្រើបស្រាលរបស់អ្នក និងរយៈពេលដែលអ្នកមានភាពស្រើបស្រាល។
ទឹកកាមអាចមានពណ៌ខុសៗគ្នា
ទឹកកាមអាចមានពណ៌ថ្លា ស ប្រផេះ ឬលឿង។ ប្រសិនបើវាមានពណ៌ក្រហម ផ្កាឈូក ឬក្រហមត្នោត ជាធម្មតា ដោយសារតែវាមានលាយឈាម។ ជួនកាលវាជារឿងធម្មតាទេដែលមានឈាមស្រស់ ឬស្នាមក្រហមនៅក្នុងទឹកកាម។ ភាគច្រើនវាកើតឡើងដោយសារតែសរសៃឈាមតូចមួយបានបែក នៅពេលអ្នកសម្រេចកាមដោយខ្លួនឯង ឬរួមភេទជាមួយនរណាម្នាក់។ វាមិនមានគ្រោះថ្នាក់ទេ។
ប៉ុន្តែប្រសិនបើអ្នកតែងតែមានទឹកកាមពណ៌ផ្កាឈូក ក្រហមត្នោត ឬលាយឈាម អ្នកគួរតែទាក់ទងគ្លីនិករ៉ាក់ ឬមណ្ឌលសុខភាព ឬមន្ទីរពេទ្យ។ វាអាចបណ្តាលមកពីការឆ្លងមេរោគនៃបង្ហួរនោម ឬពងស្វាស។ អ្នកអាចទៅគ្លីនិកណាមួយក៏បាន ដែលអ្នកចង់ទៅ។
ភាពស៊ីសង្វាក់គ្នានៃទឹកកាម
ទឹកកាមអាចថ្លាដូចទឹក ស្អិត ឬមានដុំតូចៗ ពីមួយពេលទៅមួយពេល។
តើទឹកកាមមានក្លិន និងរសជាតិយ៉ាងណា?
រសជាតិ និងក្លិនរបស់ទឹកកាម អាស្រ័យលើអ្វីដែលអ្នកញ៉ាំ និងផឹក។ ក្លិនជារឿយៗកាន់តែខ្លាំង និងកាន់តែប្រមូលផ្តុំ ប្រសិនបើអ្នកផឹកទឹកតិចតួច ពេក។ រសជាតិ និងក្លិនគឺខុសគ្នាពីមនុស្សម្នាក់ទៅមនុស្សម្នាក់ ដោយមិនកំណត់បាន។
ទឹកកាម ការមានផ្ទៃពោះ និងជំងឺកាមរោគ
ការឆាប់ចេញទឹកកាម ឬក្រចេញទឹកកាម មិនមែនជាហេតុផលដែលទាក់ទងនឹងការងាយ ឬពិបាកមានផ្ទៃពោះនោះទេ។
ឯការលេប ឬមានទឹកកាមចូលក្នុងមាត់ ក៏មិនអាចឱ្យស្ត្រីមានផ្ទៃពោះដែរ។
វាក៏មិនមានគ្រោះថ្នាក់ក្នុងការមានទឹកកាមចូលក្នុងមាត់ ឬលេបវានោះដែរ ប៉ុន្តែជំងឺកាមរោគមួយចំនួនអាចចម្លងតាមវិធីនោះ។ ដើម្បីការពារខ្លួនអ្នក អ្នកអាចប្រើស្រោមអនាម័យនៅពេលអ្នករួមភេទតាមមាត់ជាមួយនរណាម្នាក់។
មតិយោបល់