តើបុរសត្រូវធ្វើអ្វីខ្លះ ដើម្បីជួយបង្កើនចំនួន និងគុណភាពមេជីវិតឈ្មោល?
ប្រសិនបើអ្នកកំពុងព្យាយាមយកកូនហើយនៅតែមិនបានសម្រេច ប្រហែលជាអ្នកអាចមានចំនួនមេជីវិតឈ្មោលតិច។ ប៉ុន្តែសូមកុំបារម្ភ តាមពិតទៅ នេះគឺជាមូលហេតុទូទៅបំផុតមួយនៃការពិបាកមានកូនចំពោះបុរស។
អ្នកត្រូវទៅពិគ្រោះជាមួយគ្រូពេទ្យដើម្បីដឹងពីមូលហេតុពិតប្រាកដ ប៉ុន្តែមានរឿងមួយចំនួនដែលអ្នកអាចធ្វើបានដើម្បីបង្កើនចំនួនមេជីវិតឈ្មោលតាមធម្មជាតិ ហើយវិធីទាំងនោះគឺសាមញ្ញៗណាស់។
តើចំនួនមេជីវិតឈ្មោលប៉ុន្មានដែលចាត់ទុកថាតិច?
ចំនួនមេជីវិតឈ្មោល "ធម្មតា" គឺយ៉ាងហោចណាស់មាន ១៥លានក្បាល ក្នុងមួយមីលីលីត្រនៃទឹកកាម។ ប្រសិនបើអ្នកមានចំនួនមេជីវិតទាបជាងនេះ នោះគ្រូពេទ្យចាត់ទុកថាអ្នកមានចំនួនមេជីវិតឈ្មោល "តិច" ដែលពាក្យបច្ចេកទេសហៅថា Oligospermia។ នៅពេលដែលអ្នកមានមេជីវិតឈ្មោលតិច ឱកាសដែលមេជីវិតឈ្មោលទៅបង្កកំណើតជាមួយមេជីវិតញីក៏តិចដែរ ហើយត្រូវបានចាត់ទុកថាជាបញ្ហាពិបាកមានកូន។
ចំនួននៃមេជីវិតឈ្មោលតិច ក៏ជាផ្នែកមួយនៃការបង្ហាញពីគុណភាពនៃមេជីវិតឈ្មោលរបស់អ្នកដែរ។
បន្ថែមពីនេះ មេជីវិតឈ្មោលក៏ត្រូវមានសុខភាពល្អគ្រប់គ្រាន់ដើម្បីធ្វើដំណើរពីទ្វារមាសរបស់ដៃគូអ្នកទៅកាន់មាត់ស្បូន ស្បូន និងទៅដល់កន្សោមពង បើមិនដូច្នោះទេ អ្នកនឹងពិបាកធ្វើឱ្យដៃគូមានផ្ទៃពោះណាស់។
មានចំណុច ២ផ្សេងទៀតដែលគ្រូពេទ្យអាចវាស់វែងបានថា មេជីវិតឈ្មោលរបស់អ្នកមានសុខភាពល្អ ឬមាន "គុណភាព" នោះគឺ៖
ចលនា៖ ចលនារបស់មេជីវិត សំដៅលើល្បឿន ឬសមត្ថភាពដែលមេជីវិតឈ្មោលរបស់អ្នកធ្វើដំណើរទៅកាន់គោលដៅចុងក្រោយរបស់វា គឺកន្សោមពងរបស់ដៃគូអ្នក។ មេជីវិតឈ្មោលយ៉ាងហោចណាស់ ៥០% ត្រូវមានចលនា និងសមត្ថភាពហែល។
រូបរាង៖ មេជីវិតឈ្មោលធម្មតាមាន ក្បាលរាងដូចស៊ុត និងកន្ទុយវែងដូចកូនក្អុក។ មេជីវិតឈ្មោលប្រើកន្ទុយដើម្បី "ហែល" ទៅរកមេជីវិតញី។ មេជីវិតឈ្មោលដែលមានរាងធម្មតាកាន់តែច្រើន វានឹងកាន់តែងាយស្រួលសម្រាប់ពួកគេទៅដល់កន្សោមពងរបស់ដៃគូអ្នក។
មូលហេតុនៃចំនួនមេជីវិតឈ្មោលតិច
បញ្ហាជាច្រើនអាចនាំឱ្យបរិមាណមេជីវិតឈ្មោលទាប រួមមានទាំងប្រវត្តិសុខភាពកន្លងមក អាយុ និងបរិស្ថានរបស់អ្នក។ របៀបរស់នៅក៏ជាកត្តាមួយដែរ ដូច្នេះប្រសិនបើអ្នកជក់បារី ឬប្រើប្រាស់គ្រឿងញៀនដែលមានកម្រិត អាចប៉ះពាល់ដល់ការមានកូនរបស់អ្នកបាន។
វិធីងាយៗដើម្បីជួយមេជីវិតឈ្មោលរបស់អ្នកឱ្យមានគុណភាព
មានសកម្មភាពមួយចំនួនដែលអ្នកអាចធ្វើ ដើម្បីបង្កើនបរិមាណមេជីវិតឈ្មោលដែលមានសុខភាពល្អ និងគុណភាព ដែលរាងកាយរបស់អ្នកបានផលិត ដូចជា៖
លំហាត់ប្រាណ៖ យើងដឹងហើយថា ការធ្វើលំហាត់ប្រាណកម្រិតមធ្យមអាចជួយលើកទឹកចិត្ត និងធ្វើឲ្យមានអារម្មណ៍ល្អ។ តាមការសិក្សាបានឱ្យដឹងថា វាក៏អាចជួយបង្កើនចំនួនមេជីវិតផងដែរ។ អ្នកស្រាវជ្រាវបានរកឃើញថា បុរសដែលធ្វើលំហាត់ប្រាណយ៉ាងហោចណាស់ ៣ដងក្នុងមួយសប្ដាហ៍ ដោយម្តងៗប្រហែល១ម៉ោង មានការកើនឡើងទាំងចំនួនមេជីវិត និងមេជីវិតឈ្មោលដែលមានចលនាផងដែរ។
កាត់បន្ថយភាពតានតឹង៖ វាងាយស្រួលនិយាយជាងធ្វើ ប៉ុន្តែអ្នកត្រូវតែធ្វើវា ជាពិសេសប្រសិនបើអ្នកកំពុងព្យាយាមយកកូន។ នៅក្នុងការសិក្សាមួយលើបុរស ៩៥០នាក់ អ្នកស្រាវជ្រាវបានរកឃើញថា បុរសដែលជួបប្រទះព្រឹត្តិការណ៍តានតឹងលើសពីពីរដង មុនពេលចាប់ផ្តើមការព្យាបាលការពិបាកមានកូន ទំនងជាមានបរិមាណ និងចលនាមេជីវិតឈ្មោលទាប។
បញ្ឈប់ការជក់បារី៖ បុរសដែលជក់បារី ទំនងជាមានចំនួន និងចលនាមេជីវិតឈ្មោលទាប ហើយការផលិតទឹកកាមក៏តិចជាងបុរសដែលមិនជក់បារីផងដែរ។
និយាយថាទេចំពោះគ្រឿងញៀន៖ គ្រឿងញៀនមួយចំនួន ដូចជាកូកាអ៊ីន និងហេរ៉ូអ៊ីន អាចប៉ះពាល់ដល់សមត្ថភាពរបស់អ្នកក្នុងការឡើងរឹង ឬរក្សាការឡើងរឹងរបស់លិង្គ។ គ្រឿងញៀនផ្សេងទៀត ដូចជា កញ្ឆា (Marijuana) អាចធ្វើឱ្យមានភាពពិបាកក្នុងការផលិតមេជីវិតឈ្មោល ហើយអាចកាត់បន្ថយចលនាមេជីវិតឈ្មោលរបស់អ្នក ឬរារាំងពួកគេពីការលូតលាស់ជាធម្មតាផងដែរ។
របបអាហារ៖ ការជ្រើសរើសរបបអាហារដែលផ្សំឡើងពី ផ្លែឈើ និងបន្លែស្រស់ៗ អាចបង្កើនគុណភាពទឹកកាមរបស់អ្នក។ ការញ៉ាំ អាហារដែលមានជាតិខ្លាញ់តិច និងប្រូតេអ៊ីនតិចក៏អាចជួយបានដែរ។
ដើម្បីបង្កើនសុខភាពមេជីវិតឈ្មោល សូមអនុវត្តរបៀបរស់នៅដែលមានសុខភាពល្អ ដូចមានរៀបរាប់ខាងលើ បន្ថែមពីនោះ ការរក្សាស៊ីតណ្ហភាពរាងកាយ ដោយចៀសវាងការត្រាំទឹកក្តៅញឹកញាប់ និងចៀសវាងសម្លៀកបំពាក់ តឹង រឺប ជាដើម។ គ្រប់គ្រងភាពតានតឹង និងពិគ្រោះជាមួយគ្រូពេទ្យ អំពីជាតិពុលក្នុងបរិស្ថាន ឬថ្នាំពេទ្យដែលអាចបង្កគ្រោះថ្នាក់ដល់សុខភាពអ្នក។
អត្ថបទពាក់ព័ន្ឋផ្សេងៗទៀត៖
https://shorturl.at/fox5J
មតិយោបល់