អង្គការរ៉ាក់ តំណាងដោយលោកស្រីបណ្ឌិត សាផន សុមោលីរស្មី នាយិការរងអង្គការរ៉ាក់ បានអញ្ជើញចូលរួមជា​សមាជិក​គណៈប្រតិភូជាមួយប្រតិភូតំណាងរាជរដ្ឋាភិបាលកម្ពុជា ក្នុងកិច្ចប្រជុំគណកម្មាធិការប្រជាជន និង​ការអភិវឌ្ឍន៍លើកទី ៥៨ ក្រោមមូលបទ “ធានាឱ្យជីវភាពរស់នៅរបស់ប្រជាជនប្រកបដោយសុខភាពល្អ និង​លើកកម្ពស់សុខុមាលភាពរបស់មនុស្សគ្រប់រូប និងគ្រប់វ័យ” (Ensuring Health Lives and Promoting Well-being for All at All Ages) នៅទីក្រុងញូយយ៉ក ចាប់ពីថ្ងៃទី ០៧ ដល់ថ្ងៃទី ១១ ខែមេសា ឆ្នាំ២០២៥។

នៅក្នុងឱកាសនៃកិច្ចប្រជុំដ៏មានអត្ថន័យនេះ លោកស្រីក៏ត្រូវបានអញ្ជើញចូលរួមជាវាគ្មិន កិត្តិយសតំណាង​អង្គការ​សង្គមស៊ីវិល ក្នុងវេទិការអម ដែលរៀបចំឡើងដោយរដ្ឋាភិបាលប្រទេសអូស្ត្រាលី និង មូលនិធិប្រជាជនអង្គការ​សហប្រជាជាតិ ក្រោមប្រធានបទ “ប្រទេសនៅតំបន់មេគង្គ ទទួលបាននូវអនុភាពក្នុងផ្នែកសុខភាព និង សុខមាលភាព​តាមរយៈភាពធន់ប្រជាសាស្ត្រ” (Mekong countries leveraging gains in health and well-being through demophraphic resillience) នាថ្ងៃទី១០ ខែមេសា ឆ្នាំ២០២៥ផងដែរ។

នៅក្នុងវេទិកានេះលោកស្រី បានចែករំលែកអំពីតម្លៃនៃការចូលរួមជាសមាជិកអ្នកអង្កេតការនៃគណកម្មាធិការពិសេស​តាមដាន​ការអនុវត្តកម្មវិធីសកម្មភាពនៃសន្និសិទ្ធអន្តរជាតិស្តីពីប្រជាជននិងអភិវឌ្ឈន៍ ដោយសង្កត់ធ្ងន់លើ​កិច្ចខិតខំ​ប្រឹងប្រែង និងការប្តេជ្ញាចិត្តរបស់ខ្លួនលើការលើកកម្ពស់ផ្នែកសុខភាពនៅក្នុងប្រទេសកម្ពុជា។

ចាប់តាំងពីឆ្នាំ ១៩៩៦ អង្គការរ៉ាក់បានចូលរួមលើកកម្ពស់សុខមាលភាពប្រជាជន តាមរយៈការពង្រឹង និងកែលម្អ​គុណភាពសេវាសុខភាព និងការលើកកម្ពស់ការយល់ដឹង ការទទួលបានព័ត៌មានស្តីពីសុខភាព ការស្វែងរកការ​គាំទ្រមតិ ជាពិសេសទៅលើ សុខភាពផ្លូវភេទ សុខភាពបន្តពូជ និងសិទ្ធិ។

ឱកាសនៃការចួលរួមនៅក្នុងគណកម្មាធិការពិសេសនេះ បានបង្ហាញឱ្យឃើញថា រាជរដ្ឋាភិបាលកម្ពុជា ទទួលស្គាល់​ការចូលរួមរបស់អង្គការសង្គមស៊ីវិលក្នុង ការលើកកម្ពស់គណនេយ្យភាព និងតម្លាភាព ដែលអាចធានាបានថា​គោលដៅ​ដែល​បានឯកភាពនៅក្នុងសន្និសិទ្ធអន្តរជាតិស្តីពីប្រជាជន និងការអភិវឌ្ឈន៍ មានមូលដ្ឋាននៅក្នុង​ការពិត​នៃសង្គមកម្ពុជា។