ផលប៉ះពាល់សុខភាពនៃការទទួលទានគ្រឿងស្រវឹងច្រើនហួសកម្រិត
អាល់កុល ជាសារធាតុរាវម្យ៉ាងដែលស្តិតក្នុងជំពូកអេតាណុល ដែលគេអាចប្រើសម្រាប់បញ្ឆេះគ្រឿងយន្ត និងថ្នាំពេទ្យ ហើយក្នុងចំណីអាហារត្រូវបានគេប្រើប្រាស់ជាគ្រឿងស្រវឹង ហៅថាស្រា។
គ្រឿងស្រវឹង ឬស្រា គឺជាសារជាតិពុលម៉្យាងដែលត្រូវបានផលិតចេញពីម្សៅមេ វាជាសារជាតិដែលមានឥទ្ធិពលដល់ចិត្តសាស្ត្រ និងធ្វើឱ្យមានការផ្លាស់ប្តូរផ្នែកអារម្មណ៍ដល់អ្នកប្រើប្រាស់។ ស្រាធ្វើឱ្យប៉ះពាល់ ឬខូចខាតស្ទើរគ្រប់សរីរាង្អក្នុងខ្លួនយើង ប្រសិនបើមានការទទួលទានច្រើនពេក។ វាក៏នាំឱ្យមានការផ្លាស់ប្តូរដំណើរការក្នុងសរីរាង្គរបស់យើង ទាំងរាងកាយ ខួរក្បាល ហើយក្នុងនោះ អ្នកទទួលទានជាប់អាចនាំឱ្យញៀន។
នៅក្នុងសង្គមបច្ចុប្បន្ន គ្រឿងស្រវឹងភាគច្រើន ត្រូវបានដាក់ជូនសម្រាប់បម្រើការនៅក្នុងពិធីជួបជុំនានា ដូចជា ពិធីអាពាហ៌ពិពាហ៌ ឡើងគេហដ្ឋាន ខួបកំណើត និងកម្មពិធីជប់លៀងផ្សេងៗ។ ជាទូទៅ គ្រឿងស្រវឹង មានឈ្មោះផ្សេងៗគ្នាទៅតាមតំបន់ និងប្រទេសនីមួយៗ ដែលក្នុងនោះមានដូចជា ទឹកត្នោតជូរ ស្រាបៀរ ស្រាក្រហម ស្រាវីស្គី ម៉ាទីនី ជាដើម។
បរិមាណនៃជាតិអាល់កុលសុទ្ធត្រូវបានរកឃើញនៅក្នុង៖
ស្រាបៀរ ៣៥០ មល (ជាតិអាល់កុល ៥%)
ទឹកត្នោតជូរ ៣០០ មល (ជាតិអាល់កុល ៣%)
ស្រាក្រហម ១៥០ មល (ជាតិអាល់កុល ១២%)
ស្រាខ្លាំង ៤៥ មល (ជាតិអាល់កុល ៤០%) ឧ. Gin, Rum, Vodka, Whiskey
មនុស្សដែលមិនគួរពិសាគ្រឿងស្រវឹង រួមមាន៖
អ្នកមានអាយុតិចជាង ២១ឆ្នាំ
អ្នកមានផ្ទៃពោះ ឬត្រៀមមានផ្ទៃពោះ ស្រ្តីទើបឆ្លងទន្លេរួច ស្រ្តីកំពុងបំបៅដោះកូន
អ្នកបើកបរគ្រឿងយន្តគ្រប់ប្រភេទ អ្នកមានគម្រោងចេញដំណើរមានណាត់ទៅណាមួយដែលត្រូវធ្វើដំណើរតាមរយៈ យានជំនិះផ្សេងៗ
អ្នកកំពុងព្យាបាល រឺកំពុងប្រើប្រាស់ថ្នាំផ្សេងៗ
អ្នកដែលមានប្រតិកម្មជាមួយគ្រឿងស្រវឹង
អ្នកដែលបានផ្តាច់ការញៀនស្រាបានរួចហើយ
អ្នកកំពុងមានជំងឺផ្សេងៗដូចជា ជំងឺលើសសម្ពាធឈាម ជំងឺបេះដូង រលាកថ្លើម រលាកលំពែង រលាកតម្រងនោមជាដើម
ផលប៉ះពាល់សុខភាពរយៈពេលខ្លី ឬភ្លាមៗ
ការប្រើប្រាស់គ្រឿងស្រវឹងច្រើនហួសប្រមាណមានផលប៉ះពាល់ភ្លាមៗដែលបង្កើនហានិភ័យនៃស្ថានភាពសុខភាពដែលបង្កគ្រោះថ្នាក់ជាច្រើន មានដូចខាងក្រោម៖
នៅលើស្បែក អាចឡើងរោល ក្រហមមុខ ហើម ឬអាឡែកស៊ី
បាត់បង់ការគ្រប់គ្រងអារម្មណ៍ ស្មារតី
ងងុយគេង បាត់បង់ជាតិស្ករ រាគ ក្អួត ចង្អោរ ចង្វាក់បេះដូងមិនប្រក្រតី ខ្យល់គ សន្លប់
គ្រោះថ្នាក់ចរាចរណ៍ លង់ទឹក រលាក ឆក់ខ្សែភ្លើង
អំពើហឹង្សាផ្សេងៗទាំងក្នុងគ្រួសារ និងអ្នកដទៃ ការរំលោភផ្លូវភេទ ការធ្វើអត្តឃាត រឺសម្លាប់ខ្លួន
ការពុលស្រា រឺអាល់កុល ដែលបណ្តាលមកពីកម្រិតជាតិអាល់កុលក្នុងឈាមខ្ពស់ នាំឱ្យមានការសង្រ្គោះបន្ទាន់
ប៉ះពាល់ដល់ផ្លូវភេទ រួមទាំងការរួមភេទដោយមិនបានការពារ ឬការរួមភេទជាមួយដៃគូច្រើន អាចបណ្តាលឱ្យមានផ្ទៃពោះដោយអចេតនា ឬជំងឺកាមរោគ រួមទាំងមេរោគអេដស៍
ផល់ប៉ះពាល់សុខភាពរយៈពេលវែង
ការប្រើប្រាស់គ្រឿងស្រវឹងច្រើនហួសប្រមាណអាចនាំទៅរកការវិវត្តនៃជំងឺរ៉ាំរ៉ៃ និងបញ្ហាធ្ងន់ធ្ងរផ្សេងទៀតរួមមាន៖
ជំងឺលើសសម្ពាធឈាម ជំងឺបេះដូង ជំងឺដាច់សរសៃឈាមខួរក្បាល ជំងឺថ្លើម ប៉ះពាល់លំពែងដែលអាចឱ្យទៅជា ជំងឺទឹកនោមផ្អែម បញ្ហារំលាយអាហារក្នុងក្រពះ ពោះវៀន ជំងឺតម្រងនោម
ជំងឺកង្វះអាហារូបត្ថម្ភ ដោយសារក្រពះ ពោះវៀនស្រូបអត់បានល្អ ដែលនាំឱ្យខ្វះជាតិវីតាមីន ប្រូតេអ៊ីន និងសារជាតិរ៉ែផ្សេងៗ
មហារីកសុដន់ មាត់ បំពង់ក បំពង់អាហារ ប្រអប់សំឡេង ថ្លើម ពោះវៀនធំ និងរន្ធគូទ
ការចុះខ្សោយនៃប្រព័ន្ធភាពស៊ាំ បង្កើនឱកាសនៃការឈឺចាប់
បញ្ហាក្នុងការសិក្សា និងការចងចាំថយចុះ រឺបាត់បង់ រួមទាំងជំងឺវង្វេង ជាពិសេសអ្នកកំពុងសិក្សា
បញ្ហាសុខភាពផ្លូវចិត្ត រួមទាំងជំងឺធ្លាក់ទឹកចិត្ត និងថប់បារម្ភ
បញ្ហាសង្គម រួមទាំងបញ្ហាគ្រួសារ បញ្ហាទាក់ទងនឹងការងារ និងភាពអត់ការងារធ្វើ
អសមត្ថភាពផ្លូវភេទ ទាំងបុរស និងស្រ្តី (បុរស ធ្វើឱ្យឆាប់ចេញទឹកកាម លិង្គមិនឡើងរឹង មេជីវិតបុរសថយចុះ ចំណែកស្រ្តី អាចប៉ះពាល់ទាំងសម្ភព និងរោគស្រ្តី និងអ្នកមានផ្ទៃពោះអាចឱ្យប៉ះពាល់ទារកក្នុងផ្ទៃ អាចរលូតកូន កូនកើតមុនកំណត់ រឺកូនមានសតិបញ្ញាមិនល្អ)
អាចឱ្យមុខចាស់ជាងវ័យ
ក្លាយជាអ្នកញៀនសុរា
រៀបរៀងដោយ: វេជ្ជ. ជា សុគន្ធារី គ្រូពេទ្យទទួលបន្ទុកគ្លីនិករ៉ាក់ចាក់អង្រែ
ប្រភពឯកសារ:
Last Reviewed: February 29, 2024
Source: Division of Population Health , National Center for Chronic Disease Prevention and Health Promotion , Centers for Disease Control and Prevention
មតិយោបល់