រំលងម៉ឺនុយទំព័រ

បទពិសោធន៍នៃជីវិត៖ ករណីសិក្សាស្តីពីការឆ្លងមេរោគអេដស៍របស់យុវជនម្នាក់

បទពិសោធន៍នៃជីវិត៖ ករណីសិក្សាស្តីពីការឆ្លងមេរោគអេដស៍របស់យុវជនម្នាក់

រឿងជោគជ័យ
154

«ខ្ញុំ​មិន​អាច​បន្ទោស​នរណា​ម្នាក់​ទេ​ព្រោះ​នេះ​គឺ​ជា​កំហុស​របស់​ខ្ញុំ​ដែល​សប្បាយភ្លេចខ្លួន​មួយ​រយៈ​! ​» ​នេះ​ជា​ការ​លើក​ឡើង​របស់​យុវជន​ម្នាក់​ដែល​ទើប​រក​ឃើញ​ថា​ខ្លួនមានផ្ទុក​មេរោគ​អេដស៍​កាល​ពី​ខែ​កុម្ភៈ​ ឆ្នាំ​២០២៤។

ឆេន ឆន (ឈ្មោះតាង) ជាយុវជនវ័យក្មេងមួយរូប ដែលកើត​ក្នុង​ឆ្នាំ​២០០២ និង​មាន​លំនៅ​បច្ចុប្បន្ន​ក្នុង​ខេត្ត​សៀមរាប។ សព្វថ្ងៃ យុវវជនរូបនេះមានតួនាទីជាបុគ្គលិក ​បម្រើ​ការ​នៅក្នុង​ក្រុមហ៊ុន​ឯកជនមួយ​​។​ ឆន បានឱ្យ​ដឹង​ថា​ លោក​ចាប់​ផ្ដើម​ធ្វើ​តេស្ត​រក​មេរោគ​អេដស៍ដំបូង​នៅ​ឆ្នាំ​២០១៨ ដោយ​កាល​នោះ​​កំពុង​នៅ​ជា​សិស្ស​នៅ​ឡើយ​។​ ដោយសារ​តែ​ដឹង​ថា​ខ្លួន​ជា​អ្នក​មាន​ការ​ប្រឈម​ខ្ពស់​បែប​នេះ​ហើយ​បាន​ជា​លោក ឆេន ឆន តែង​តែ​ស្វែង​រក​ការ​ធ្វើ​តេស្ត​រក​មេរោគ​អេដស៍​ជា​ប្រចាំ​។ គិត​ពី​ពេល​លោក​ធ្វើ​តេស្ដ​លើក​ដំបូង​ក្នុង​ឆ្នាំ​​២០១៨ មក​ដល់ខែ​កុម្ភៈ ឆ្នាំ​២០២៤ លោក​បាន​ធ្វើ​តេស្ត​​រក​មេរោគ​អេដស៍ និង​ស្វាយ​ចំនួន​២៧​ដងរួចមកហើយ។​  «ខ្ញុំធ្លាប់បានធ្វើតេស្តជាមួយបងៗអ្នកអប់រំនៅតាមសហគមន៍តាំងពីខែ១០ ឆ្នាំ​២០១៨​ មកម្ល៉េះ តែក្នុងអំឡុងពេលនោះខ្ញុំហាក់ដូចជាពុំសូវទាន់ប្រឡូកនឹងការរួមភេទច្រើនទេ​ ដោយសាររាងខ្លាចដែរ ណា​មួយ​នៅ​រៀន​ហើយ​ក៏​ពុំ​សូវ​ចេះ​ដើរ​លេង​ច្រើន​ដែរ​»។ ទោះជាយ៉ាងណា ក្រោយពីបញ្ចប់ភាពជាសិស្ស ឆនបានសារភាពថា លោក​មាន​ភាព​ងាយ​ស្រួល​ក្នុង​ការ​រក​ដៃគូ​រួម​ភេទ និង​​​​បាន​ផ្លាស់​ប្ដូរ​ដៃ​គូជា​ច្រើនក្នុងយុវវ័យភាពរបស់ខ្លួន។ លោកបានអះអាងថា​លោក​​បាន​ព្យាយាម​ប្រើ​ស្រោមអនាម័យ​រាល់​ពេល​រួម​ភេទ។ ប៉ុន្តែ​នៅ​ពេល​ស្រវឹង វាអាចមានភាព​ចន្លោះ​ប្រហោង​ក្នុង​ការ​ការ​ពារ​ខ្លួន​។ «​ខ្ញុំ​ក៏​មិន​ដែល​នឹក​ស្មាន​ថា​ខ្ញុំ​មាន​ថ្ងៃ​នេះ​ទេ!​ ពី​ព្រោះ​ថា​ពេលមាន​ដៃ​គូ​ ខ្ញុំតែង​ប្រើ​ស្រោម​អនាម័យ។ ​តែ​ខ្ញុំប្រាកដចិត្ត​១០០% នោះ​ទេ ពី​ព្រោះ​ជួន​កាល​ខ្ញុំ​ក៏​ស្រវឹង​។ វាជាឱកាសដែលខ្ញុំប្រឈមនឹងការឆ្លងនេះខ្ពស់តែម្តង។ ហើយពេលនេះវាបានកើតឡើងមកលើរូបខ្ញុំមែន​»

លោកបានក្រើនរំលឹកដល់យុវជនដទៃទៀតថា បើទោះជាយើងមានការយកចិត្តទុកដាក់ក្នុងការស្វែងរក​តេស្ត និងធ្វើ​ច្រើន​ដង​ក៏​ដោយ ប៉ុន្តែកត្តាសំខាន់ គឺការកែប្រែឥរិយាបថប្រឈមរបស់ខ្លួន។ លោកសំដែងនូវិប្បដិសារី នៃការធ្វេសប្រហែសរបស់ខ្លួន ដែលធ្វើឱ្យគាត់មានលទ្ធផលបែបនេះ ប៉ុន្តែទោះជាយ៉ាងណា យុវវជនរូបនេះ បានប្តេជ្ញាចិត្តក្នុងការទទួលការថែទាំ និងព្យាបាលដើម្បីថែរក្សាសុខភាពរបស់ខ្លួន។ លោកបានលើកឡើងថា ការ​មិន​កែប្រែ​ឥរិយាបថ​​ប្រឈម នឹងនាំមកនៅគ្រោះមហន្តរាយនៃសុខភាព តាមរយៈការឆ្លងជំងឺអេដស៍ និងជំងឺកាមរោគផ្សេង។ ។

លោកក៏បានសម្តែងនូវការអរគុណចំពោះការចូលរួមលើកកម្ពស់សុខភាពរបស់អង្គការរ៉ាក់ និងអង្គការដៃគូដែលបានលើកទឹកចិត្ត និងគាំទ្រដល់ការថែរក្សាសុខភាព។ លោកសង្ឃឹមថា បទពិសោធន៍របស់លោក ជាឧទាហរណ៍មួយសម្រាប់ឱ្យយុវវជនដទៃមានការប្រុងប្រយ័ត្នខ្ពស់ចំពោះការថែរក្សា និងការពារការឆ្លងមេរោគអេដស៍ និងហានិយភ័យផ្សេងទៀត ចំពោះខ្លួនឯង និងដៃគូរបស់ខ្លួន។

អត្ថបទផ្សេងៗជាច្រើនទៀត៖
វិប្បដិសារីនៃខ្ញុំ​​ភាពក្លាហានបានបញ្ជាក់នូវភាពជាខ្លួនឯងពេញលេញ

អត្ថបទដោយ: RHAC

មតិយោបល់