តើរោគសញ្ញានៃជំងឺស្វាយមានអ្វីខ្លះ?
រាល់កង្វល់អំពីសុខភាពបុរស ស្ត្រី សូមទំនាក់ទំនងទៅកាន់ភ្នាក់ងាររបស់រ៉ាក់តាមទូរស័ព្ទលេខ ០១០ ៨១២៨១២ ឬ ០៨៩ ៣៣៣ ៩៩០ ឬ ០៨៨ ៧១០៧ ១០៧ ឬឆាតទៅបណ្តាញសង្គមហ្វេសប៊ុករ៉ាក់ ដោយឥតគិតថ្លៃ។
ជំងឺស្វាយ គឺជាប្រភេទជំងឺកាមរោគដែលជាទូទៅ តែងត្រូវបានដឹង ស្ទើរគ្រប់បុគ្គលជាពិសេសក្នុងវ័យបន្តពូជ។ ទោះជាយ៉ាងណា មានរឿងជាច្រើនដែលយើងគួរតែស្វែងយល់អំពីជំងឺស្វាយនេះ!
យើងសូមចែករំលែកព័ត៌មានមួយជ្រុងនៃរោគសញ្ញានៃជំងឺស្វាយមកចែកជូនបងប្អូនទាំងអស់។
តើបងប្អូនដឹងទេថា ជំងឺស្វាយត្រូវបានបែងចែកជាប៉ុន្មានដំណាក់កាល? និងមានរោគសញ្ញាអ្វីខ្លះ?
ជំងឺស្វាយចែកចេញជាបីដំណាក់កាល ហើយរោគសញ្ញាដែលអ្នកមានគឺអាស្រ័យលើដំណាក់កាលនៃជំងឺដែលអ្នកកំពុងស្ថិតនៅ។ ប៉ុន្តែដំណាក់កាលអាចត្រួតលើគ្នា ហើយរោគសញ្ញាមិនតែងតែវិវត្តទៅតាមលំដាប់ដូចគ្នានោះទេ។ ម្យ៉ាងវិញទៀត អ្នកអាចមានការឆ្លងជំងឺកាមរោគហើយ តែអ្នកមិនមានសញ្ញាណាមួយនៃជំងឺនេះអស់រយៈពេលជាច្រើនឆ្នាំ ក៏មាន។
ប៉ុន្តែទោះបីជាអ្នកមិនមានរោគសញ្ញាក៏ដោយ អ្នកនៅតែអាចចម្លងទៅដៃគូរួមភេទរបស់អ្នកបានដដែល។ ប្រសិន បើអ្នកគិតថាអ្នកមានមេរោគ ឬមានឱកាសក្នុងការឆ្លងរោគស្វាយ សូមទៅពិនិត្យ និងព្យាបាលភ្លាមៗ។
ដំណាក់កាលនៃរោគស្វាយត្រូវបានគេហៅថា "បឋម ឬតំបូង" "ទីពីរ និងដំណាក់កាលលាក់មុខ " និង "ទី៤ ឬដំណាក់កាលយឺតយ៉ាវ" ។ ខាងក្រោមនេះ គឺជាការចែករំលែកអំពីរោគសញ្ញាទៅតាមដំណាក់កាលនីមួយៗ។
រោគស្វាយដំបូង ឬដំណាក់កាលទី១
រោគសញ្ញាសម្រាប់ដំណាក់កាលដំបូងជាធម្មតាលេចឡើងពី ១០ ថ្ងៃទៅ ៣ ខែបន្ទាប់ពីអ្នកបានឆ្លងមេរោគស្វាយ។ អ្នកអាចសម្គាល់ឃើញថាកូនកណ្តុរនៅជិតក្រលៀនរបស់អ្នករីកធំ។ ជាទូទៅ រោគសញ្ញាដំបូងដែលអាចមើលឃើញនៃរោគស្វាយ គឺមានចំណុចដំបៅមួយ តែមិនឈឺចាប់ នៅលើស្បែក (គ្រូពេទ្យហៅវាថាជា "chancre") ហើយវាក៏អាចវិវត្តទៅជាដំបៅច្រើន។ ជាធម្មតាវាលេចឡើងនៅកន្លែងដែលបាក់តេរីជ្រៀតចូលក្នុងខ្លួនរបស់អ្នក។ ដំបៅនោះមិនឈឺចាប់ទេ ហើយវាអាចលាក់នៅខាងក្នុងរន្ធគូថ ឬទ្វារមាសរបស់អ្នក។ អ្នកប្រហែលជាមិនដឹងថាអ្នកមានវាទេ។
បន្ទាប់មកដំបៅនោះនឹងជាសះស្បើយដោយខ្លួនឯងក្នុងរយៈពេលប្រហែល ៣ ទៅ ៦ សប្តាហ៍។ ប៉ុន្តែនេះមិនមានន័យថាការឆ្លងបានបាត់ទៅវិញឡើយ។ វាមានន័យថាអ្នកហៀបនឹងចូលដល់ដំណាក់កាលទីពីរនៃរោគស្វាយ។
ដំណាក់កាលទី២នៃរោគស្វាយ
ប្រហែល ជា២ ទៅ ១០ សប្តាហ៍បន្ទាប់ពីដំណាក់កាលដំបូងលេចឡើង អ្នកអាចវិវត្តដូចខាងក្រោមៈ
កន្ទួលលើស្បែកដែលបណ្តាលឱ្យមានដំបៅតូចៗពណ៌ក្រហមត្នោត
មានដំបៅក្នុងមាត់ ទ្វារមាស ឬរន្ធគូថ
គ្រុន
ហើមកូនកណ្តុល
ស្រកទម្ងន់
ជ្រុះសក់
ឈឺក្បាល
អស់កម្លាំងខ្លាំង
ឈឺសាច់ដុំ
ប្រសិនបើអ្នកមិនទទួលបានការព្យាបាលភ្លាមៗទេ រោគសញ្ញារបស់អ្នកនឹងបាត់ទៅវិញ រួចកើតវិញ ទៅមកៗ។ អាការៈនេះនឹងកើតឡើងរហូតដល់មួយឆ្នាំ។ ទោះបីជារោគសញ្ញារបស់អ្នកមិនត្រលប់មកវិញក៏ដោយ ការឆ្លងនៅតែមាននៅក្នុងខ្លួនរបស់អ្នក។ រោគស្វាយនឹងកាន់តែមានកម្រិតធ្ងន់ធ្ងរទៅៗ ហើយអ្នកនៅតែអាចឆ្លងដល់ដៃគូរួមភេទរបស់អ្នក។
ប្រសិនបើអ្នកមិនបានព្យាបាលរោគស្វាយដំណាក់កាលទីពីរទេ ជំងឺនេះអាចនឹងឈានទៅដល់ដំណាក់កាលមិនទាន់ឃើញច្បាស់(លាក់មុខ)។ មិនមែនគ្រប់គ្នាដែលមានរោគស្វាយនឹងឆ្លងកាត់ដំណាក់កាលនេះទេ។ ប្រសិនបើអ្នកមាន អ្នកនឹងមិនមានរោគសញ្ញាអ្វីទេ ប្រហែលជារាប់ឆ្នាំ។ ក្នុងករណីខ្លះ រោគសញ្ញានឹងមិនត្រលប់មកវិញទេ។ ប៉ុន្តែការឆ្លងក៏មិនបាត់ដែរ។ បាក់តេរីនៅតែមាននៅក្នុងខ្លួន។ ករណីមួយចំនួនអាចឈានទៅដល់ដំណាក់កាលទីបីនៃជំងឺ។
រោគស្វាយដំណាក់កាលទីបី
នេះគឺជាដំណាក់កាលចុងក្រោយ និងធ្ងន់ធ្ងរបំផុតនៃជំងឺស្វាយ។ វាអាចលេចឡើងពី ១០ ទៅ ៣០ ឆ្នាំបន្ទាប់ពីការឆ្លងដំបូង។ អ្នកអាចឈានទៅរកភាពខូចខាតនៃសរីរាង្គជាអចិន្ត្រៃយ៍ និងស្លាប់បាន។ ផលវិបាកដំណាក់កាលនេះអាចរួមមាន៖
បញ្ហាខួរក្បាល (សរសៃប្រសាទ)
ជំងឺដាច់សរសៃឈាមខួរក្បាល
ការឆ្លង និងការរលាកនៃភ្នាសជុំវិញខួរក្បាល និងខួរឆ្អឹងខ្នង
ស្ពឹក
ថ្លង់
បញ្ហាមើលឃើញឬពិការភ្នែក
ការផ្លាស់ប្តូរបុគ្គលិកលក្ខណៈ
ជំងឺវង្វេង
ជំងឺសរសៃឈាមបេះដូង
សរសៃឈាមអារទែ
ការរលាកនៃសរសៃឈាម ជាដើម
រោគសញ្ញានៃរោគស្វាយចំពោះទារក
អ្នកអាចចម្លងជំងឺកាមរោគនេះទៅកូនរបស់អ្នកដែលមិនទាន់កើត ឬដល់កូនរបស់អ្នកក្នុងអំឡុងពេលសម្រាល។ គ្រូពេទ្យហៅជំងឺនេះថា ជារោគស្វាយពីកំណើត។ បើមិនបានព្យាបាលទេ វានឹងមានហានិភ័យខ្ពស់ក្នុងពេលសម្រាលកូន និងទារកអាចស្លាប់។
ទារកភាគច្រើនកើតមកដោយរោគស្វាយ មិនមានរោគសញ្ញាអ្វីឡើយ។ អ្នកខ្លះអាចមានកន្ទួលលើបាតដៃ ឬបាតជើង។ ជាយថាហេតុ ទារកអាចវិវត្តទៅជាផលវិបាកនៃសរីរាង្គជាច្រើន រួមមានៈ
ថ្លើមរីកធំ
ជំងឺខាន់លឿង
ការហូរសំបោរពីច្រមុះ
ហើមក្រពេញ
ភាពមិនប្រក្រតីនៃឆ្អឹង
បញ្ហាខួរក្បាល (សរសៃប្រសាទ) ជាដើម
សូមទៅជួបគ្រូពេទ្យជំនាញផ្នែកកុមារភ្លាមៗ ប្រសិនបើអ្នកសង្កេតឃើញថា កូនមានការហូរទឹករំអិលខុសពីធម្មតា ឈឺ ឬឡើងកន្ទួលនៅជិតក្រលៀន។
មតិយោបល់