ក្នុងការសិក្សាស្វែងយល់ដឹងអំពី សុខភាពផ្លូវភេទ សុខភាពបន្តពូជ មិនមែនសម្រាប់ស្រ្តីដែលរៀបការ ឬមានដៃគូហើយនោះទេ ហើយក៏មិនមែនជារឿងអាសអាភាស ដូចការយល់ឃើញមួយចំនួននោះដែរ។ សុខភាពផ្លូវភេទ និងសុខភាពបន្តពូជ​ មានសារៈសំខាន់សម្រាប់មនុស្សគ្រប់រូប ជាពិសេស​​យុវវ័យក្នុងវ័យបន្តពូជ គួរទទួលយកចំណេះដឹងសុខភាពផ្លូវភេទ និងសុខភាពបន្តពូជដែលមានប្រភពត្រឹម​ត្រូវ និងច្បាស់លាស់ ដោយមានទំនុកចិត្ត និងគ្មានការខ្មាសអៀននោះទេ ព្រោះចំណេះដឹងទាំងនេះ នឹងនាំឱ្យអ្នកអាចត្រៀមខ្លួនជាមុន និងការការពារខ្លួនពីការបង្ករោគតាមផ្លូវបន្តពូជផ្សេងៗ ដូចរឿងរ៉ាវខាងក្រោមនេះ៖

យុវតី លំអរ ពេជ្រ មានអាយុ ១៧ឆ្នាំ កំពុងរៀនថ្នាក់ទី១០ នៃវិទ្យាល័យមួយនៅខេត្តបាត់ដំបង។ នាងបានធំធាត់ និងពេញវ័យ ក្នុងសហគមន៍មួយដែលពុំសូវបើកចំហរលើការយល់ដឹងអំពីសុខភាពផ្លូវភេទ សុខភាពបន្តពូជ។ យុវតី លំអរ ពេជ្រ មានអារម្មណ៍ខ្មាសអៀន និងគ្មានទំនុកចិត្ត ពេលនិយាយអំពីសុខភាពផ្លូវភេទ និងសុខភាពបន្ត ហើយពេលខ្លះ នាងបានធ្លាប់គិតថា៖ «ចំណេះដឹងអំពីសុខភាពផ្លូវភេទ និងសុខភាពបន្តជារឿងអាសអាភាស » ។

នាងជាសិស្សដែលកំពុងរៀននៅក្នុងសាលារៀនដែលជាក្រុមគោលដៅក្នុងកម្មវិធីសុខភាពយុវវ័យរបស់អង្កការ រ៉ាក់ ហើយថ្ងៃមួយនាងបានចូលរួមក្រុមពិភាក្សាស្តីពីសុខភាពផ្លូវភេទ សុខភាពបន្តពូជជាមួយបុគ្គលិកអង្គការរ៉ាក់លើប្រធានបទ «ការបង្ករោគតាមផ្លូវបន្តពូជ និងជំងឺកាមរោគ» ។ នាងបានរំលឹកពេលវេលាមុននាងចូលរួម ក្រុមពិភាក្សាជាមួយរ៉ាក់​ ដោយបានពោល៖ « ដំបូង ខ្ញុំមានអារម្មណ៍ខ្មាសអៀន ហើយបានគិតថាជារឿងអាសអាភាសដែលគ្មាននរណាម្នាក់គួរនិយាយរឿងនេះទេ ហើយមេរៀននេះសម្រាប់តែស្រ្តីមានគ្រួសារប៉ុណ្ណោះ »។ បន្ទាប់ពីបានចូលរួម និងយល់ដឹងពីសុខភាពផ្លូវភេទ និងសុខភាពបន្តពូជ នាងបានកែប្រែផ្នត់គំនិតអវិជ្ជមាន។​ មិនតែប៉ុណ្ណោះ នាងបាន​យល់ដឹងអំពីការការពារ ការអនាម័យ​ និងរបៀបឆ្លងពីជំងឺដែលបង្ករោគនៅផ្លូវបន្តពូជ។ នាងបានបន្តថា៖​ « ទោះបីជាពេលនេះខ្ញុំមិនទាន់មានគ្រួសារ ប៉ុន្តែចំណេះដឹងទាំងអស់នេះមានសារៈសំខាន់ដើម្បីឱ្យ​យើងចេះថែរក្សាសុខភាពខ្លួនឯង និងពេលមានដៃគូនៅពេលអនាគត។ មនុស្សគ្រប់រូប ជាពិសេសយុវវ័យដូចជាខ្ញុំ គួរតែសិក្សាស្វែងយល់ឱ្យបានច្រើនចៀសវាងពីការឆ្លង ឬកើតជំងឺកាមរោគជាដើម »។

        ជាចុងក្រោយយុវតី លំអរ ពេជ្រ បានថ្លែងអំណរគុណបុគ្គលិករ៉ាក់ដែលបានចុះអប់រំផ្សព្វផ្សាយពីប្រធានបទសុខភាពផ្លូវភេទ និងសុខភាពបន្តពូជ និងបានផ្តល់ព័ត៌មានកន្លែងដែលអាចផ្តល់សេវាប្រកដដោយវិជ្ជាជីវៈ និងសុវត្ថិភាពដល់សិស្សានុសិស្សនៅតាមសាលាឱ្យបានយល់ដឹង។ ជាក់ស្តែង សិស្សានុសិស្ស ឬយុវវ័យពេលជួបបញ្ហាសុខភាព ប៉ុន្តែមិនបានដឹងថាគួរតែប្រឹក្សា និងទទួលសេវានៅកន្លែងណានោះទេ។ ម្យ៉ាងទៀតនាងបានផ្តល់សារអប់រំ៖ « លើកទឹកចិត្តឱ្យយុវវ័យទាំងអស់គួរតែយកចិត្តទុកដាក់ស្វែងយល់អំពីចំណេះដឹងសុខភាពផ្លូវភេទ និងសុខភាពបន្តពូជឱ្យបានត្រឹមត្រូវ និងជម្នះភាពខ្មាសអៀន​ក្នុងការទទួលបានព័ត៌មានពិត និងត្រឹមត្រូវ»។​