ការរមាស់ទ្វារមាស ឬលិង្គ
រាល់កង្វល់អំពីសុខភាពបុរស ស្ត្រី សូមទំនាក់ទំនងទៅកាន់ភ្នាក់ងាររបស់រ៉ាក់តាមទូរស័ព្ទលេខ ០១០ ៨១២៨១២ ឬ ០៨៩ ៣៣៣ ៩៩០ ឬ ០៨៨ ៧ ១០៧ ១០៧ ឬឆាតទៅបណ្តាញសង្គមហ្វេសប៊ុករ៉ាក់ ដោយឥតគិតថ្លៃ។
នៅពេលដែលមានការរមាស់ទ្វារមាស ឬលិង្គ វាជាបទពិសោធដែលពិបាកទ្រាំណាស់មែនទេ? តើអ្នកមានកង្វល់ខ្លាំងថាតើវាជាជំងឺកាមរោគមែនទេ? តើត្រូវធ្វើដូចម្តេចដើម្បីបញ្ឈប់ការរមាស់នេះ?
សូមអានអត្ថបទខាងក្រោម ហើយព្យាយាមសាកល្បង ត្រួតពិនិត្យអំពីស្ថានភាពរបស់អ្នក។
តើមូលហេតុអ្វីដែលបណ្តាលឱ្យរមាស់មាស ឬលិង្គ/ ប្រដាប់បន្តពូជ?
ការរមាស់ប្រដាប់បន្តពូជអាចជារោគសញ្ញានៃលក្ខខណ្ឌជាច្រើនដែលអាចរួមបញ្ចូលការឆ្លងមេរោគទៅក្នុងទ្វារមាសចំពោះស្ត្រី ឬរមាស់រលាកលើលិង្គបុរស។ ទោះជាយ៉ាងណា ការរមាស់អាចបណ្តាលមកពីការរលាកស្បែក ជំងឺកាមរោគ និងអាឡែហ្សី ហើយវាកើតនៅលើទាំងបុរស និងស្ត្រី។
ក្នុងករណីជាច្រើន ការរមាស់ប្រដាប់បន្តពូជដែលបណ្តាលមកពីការរលាក ឬកកិតនឹងបាត់ទៅ ហើយភាពរមាស់នោះនឹងបាត់ទៅដោយឯកឯងដូចគ្នា។ មូលហេតុផ្សេងទៀតនៃការរមាស់អាចត្រូវការការព្យាបាលយ៉ាងយកចិត្តទុកដាក់។ ប្រសិនបើអ្នកព្រួយបារម្ភអំពីការរមាស់ប្រដាប់បន្តពូជដែលមិនបាត់ទៅវិញ សូមពិគ្រោះជាមួយវេជ្ជបណ្ឌិតរបស់អ្នក ឬអ្នកជំនាញថែទាំសុខភាពផ្សេងទៀត។
តើអ្នកអាចចៀសពីការរមាស់ប្រដាប់ភេទបានដោយរបៀបណា?
ស្ត្រីគួរអនុវត្តវិធានការខាងក្រោមនេះ ដើម្បីចៀសវាងការរមាស់ទ្វារមាស៖
ក្រោយពេលបត់ជើងតូច ឬអង្គុយបង្គន់ សូមប្រើប្រាស់ក្រដាសអនាម័យជូតសម្ងួត សម្អាតពីខាងមុខទៅខាងក្រោយ ដើម្បីការពារបាក់តេរីពីរន្ធគូទចូលទៅក្នុងទ្វារមាស។
ចៀសវាងប្រើផលិតផលគីមី ដូចជាថ្នាំបាញ់លាងចូលទ្វារមាស ឬថ្នាំបាញ់អនាម័យស្ត្រី ដែលអាចធ្វើឱ្យខូចតុល្យភាពអាស៊ីតនៃទ្វារមាស។
ចៀសវាងការប្រើផលិតផលអនាម័យស្ត្រីដែលមានក្លិនក្រអូប (សំឡីអនាម័យស្តើង ឬក្រាសដែលមានក្លិនក្រអូប ឬ សាប៊ូជាដើម)។
បុរសគួរអនុវត្តវិធានការខាងក្រោមនេះ ដើម្បីចៀសវាងការរមាស់ប្រដាប់ភេទ៖
លាងសម្អាតលិង្គឱ្យបានល្អ រួមទាំងតំបន់ក្រោមស្បែកគ្របក្បាលលិង្គចំពោះបុរសដែលមិនបានកាត់ស្បែក។
រក្សាតំបន់នោះឱ្យស្ងួត ព្រោះសំណើមក្នុងប្រដាប់ភេទអាចនាំឱ្យមានការឆ្លងមេរោគ ។ ម្សៅពោតក្នុងរដូវក្តៅអាចមានប្រយោជន៍សម្រាប់អ្នក។
ទាំងបុរស និងស្ត្រីគួរតែអនុវត្តវិធានការខាងក្រោមនេះ ដើម្បីចៀសវាងការរមាស់ប្រដាប់ភេទ៖
ស្លៀកខោទ្រនាប់ និងខោអាវដែលមានជាតិសរសៃធម្មជាតិ និងរលុងៗ។ ផ្លាស់ប្តូរខោទ្រនាប់យ៉ាងហោចណាស់រៀងរាល់ ២៤ ម៉ោងម្តង។
រក្សាតំបន់ប្រដាប់ភេទឱ្យស្អាត និងស្ងួត។ ប្រើសាប៊ូស្រាលៗ ហើយលាងសម្អាតឱ្យបានល្អ។
ប្រើសាប៊ូបោកខោអាវស្រាលៗ គ្មានក្លិនក្រអូប ដើម្បីបោកខោអាវ។
ជូតខ្លួនឱ្យស្ងួតបន្ទាប់ពីងូតទឹកនិងហែលទឹករួច។ ចៀសវាងការស្ថិតនៅក្នុងសម្លៀកបំពាក់សើមរយៈពេលយូរ។
ចៀសវាងការរួមភេទដោយមិនបានការពារ ជាពិសេសប្រសិនបើអ្នកព្រួយបារម្ភថាអ្នក ឬដៃគូរបស់អ្នកអាចឆ្លងមេរោគ។
មតិយោបល់