រ៉ាក់បានបន្តសហការយ៉ាងជិតស្និតជាមួយក្រសួងអប់រំ យុវជន និងកីឡា និងដៃគូពាក់ព័ន្ធ ដើម្បីបណ្តុះបណ្តាលមន្ត្រីក្រសួងចំនួនប្រហែល ៥០០នាក់ក្នុងមួយឆ្នាំ និងបានចូលរួមចងក្រងសៀវភៅមុខវិជ្ជាអប់រំសុខភាពសម្រាប់សិស្សនិងគ្រូថ្នាក់ទី ៥ ដល់ទី​ ១២។ រ៉ាក់បន្តសហការជាមួយមន្ទីរអប់រំ យុវជន និងកីឡាខេត្តកំពត ដើម្បីគាំទ្រដល់គ្រូបង្រៀនមុខវិជ្ជា បំណិនជីវិត សុខភាពផ្លូវភេទ សុខភាពបន្តពូជ ដល់សិស្សចំនួនជាង ៥ម៉ឺននាក់ក្នុងមួយឆ្នាំ មកពីសាលារៀនសរុបជាង៤០០កន្លែង។

ក្នុងរយៈពេល ៣ឆ្នាំកន្លងមកនេះ រ៉ាក់បានធ្វើការដោះស្រាយលើបញ្ហាជាច្រើនដែលយុវវ័យបាននិងកំពុងជួបប្រទះដោយក្នុងនោះរួមមាន៖ បញ្ហារៀបការវ័យក្មេង អំពើហិង្សាផ្លូវភេទ និងយេនឌ័រ ការទទួលបានសេវា និងព័ត៌មានត្រឹមត្រូវស្តីពីសេវាពន្យារកំណើត ការរំលូតដោយសុវត្ថិភាព និងជំនឿ បទដ្ឋានសង្គមអវិជ្ជមានមួយចំនួនដែលជាឧបសគ្គរារាំងយុវវ័យមិនអាចឱ្យពួកគេទទួលបានចំណេះដឹងពេញលេញស្តីអំពីសុខភាពផ្លូវភេទ សុខភាពបន្តពូជ និងសិទ្ធិបាន។ សកម្មភាពជាច្រើនត្រូវបានរៀបចំ និងបង្កើតឡើង ដើម្បីជាចំណែកក្នុងការលើកកម្ពស់ចំណេះដឹង និងផ្សព្វផ្សាយទៅកាន់យុវវ័យ ដោយនៅក្នុងនោះរួមមាន ការរៀបចំឱ្យមានមណ្ឌលយុវវ័យ ការធ្វើក្រុមពិភាក្សានៅតាមសាលារៀន និងសហគមន៍ ការពង្រឹងអំណាចយុវវ័យតាមរយៈការរៀបចំព្រឹត្តិការណ៍ យុទ្ធនាការនានាជាដើម ក្នុងគោលបំណងផ្តល់នូវបរិយាកាសដែលគ្មានការរើសអើងឬការវិនិច្ឆ័យ សម្រាប់យុវវ័យក្នុងការស្វែងយល់អំពីសុខភាពរបស់ខ្លួន។

ដោយឡែកបច្ចុប្បន្ននេះ យើងបាននឹងកំពុងអនុវត្តនូវសកម្មភាពមួយចំនួនផ្សេងទៀតដូចជា៖ ពង្រឹងសមត្ថភាពបណ្តាញយុវវ័យរ៉ាក់ដើម្បីសុខភាព ដោយរៀបចំឱ្យមានផែនការសកម្មភាព និងថវិកាប្រចាំឆ្នាំ ធ្វើការជាមួយសាលារដ្ឋ និងសាលាឯកជនក្នុងការបង្រៀនមុខវិជ្ជាអប់រំរឿងផ្លូវភេទគ្រប់ជ្រុងជ្រោយ និងធ្វើការជាមួយសហគមន៍រួមមានស្ត្រីបង្គោលទាក់ទងទៅនឹងជំនឿ បទដ្ឋាន និងសេវាជុំវិញការរំលូតដោយសុវត្ថិភាព។